विश्वकप छनोटमा नेपालले पहिलो खेल जिम्बावे संग खेल्ने

काठमाडौं — जेष्ठ ९, २०८०। 

आईसीसीले एकदिवसीय विश्वकप छनोटको खेलतालिका सार्वजनिक गरेको छ ।  जिम्बाब्वेमा आगामी जुन १३ गतेदेखि हुने प्रतियोगिताको खेलतालिका आईसीसीले सोमबार सार्वजनिक गरेको हो । 


विश्वकप छनोट खेल्ने १० टिमलाई आईसीसीले २ समूहमा विभाजन गरेको छ । नेपाल सम्मिलित समूह ‘ए’ मा जिम्बाब्वे, नेदरल्यान्ड्स, वेस्ट इन्डिज र अमेरिका रहेका छन् ।

त्यस्तै समूह ‘बी’ मा श्रीलंका, आयरल्यान्ड, स्कटल्यान्ड, ओमान र यूएई रहेका छन् । विश्वकप छनोटअन्तर्गत नेपालको पहिलो खेल जिम्बाब्वेविरुद्ध असार ३ गते रहेको छ । त्यसअघि जेठ ३० गते नेपालले यूएई र ओमानसँग जेठ ३२ गते वार्मअप म्याच खेल्नेछ ।

अमेरिकाविरुद्ध नेपालले समूह चरणअन्तर्गतको दोस्रो खेल असार ५ गते खेल्नेछ । त्यस्तै नेपालले असार ७ गते वेस्ट इन्डिज र असार ९ गते नेदरल्यान्ड्सविरुद्ध  खेल्नेछ ।

विश्वपक छनोट खेल्ने १० टोलीलाई आईसीसीले २ समूहमा विभाजन गरेको हो । हरेक समूहको शीर्ष ३ टिमले सुपर सिक्समा स्थान बनाउनेछन् भने सुपर सिक्समा पुगेका टोलीले एक अर्कासँग प्रतिस्पर्धा गर्नेछन् । त्यसमध्येबाट शीर्ष २ टोलीमा पुग्ने टिमले भारतमा हुने एकदिवसीय विश्वकप खेल्न पाउनेछन् ।

यसैबीच नेपाल क्रिकेट संघ(क्यान) ले एकदिवसीय विश्वकप छनोटका लागि प्रारम्भिक टोली घोषणा गरिसकेको छ । सोमबार क्यानले जिम्बाब्वेमा यही असार ३ देखि २४ गतेसम्म हुने छनोट प्रतियोगिताका लागि रोहित पौडेलको कप्तानीमा २२ सदस्यीय प्रारम्भिक टोली घोषणा गरेको हो ।

प्रारम्भिक टोलीमा कुशल भुर्तेल, आसिफ शेख, ज्ञानेन्द्र मल्ल, कुशल मल्ल, आरिफ शेख, दीपेन्द्रसिंह ऐरी, गुलशन झा, सोमपाल कामी, करण केसी, सन्दीप लामिछाने, भीम सार्की, प्रतिस जीसी, ललित राजवंशी, अर्जुन साउद, सन्दीप जोरा, देव खनाल, किशोर महतो, सूर्य तामाङ, कमलसिंह ऐरी, श्याम(मौसम) ढकाल र अविनाश बोहरा रहेका छन् ।

नेपालले गत चैत २ गते कीर्तिपुर क्रिकेट मैदानमा भएको खेलमा यूएईलाई हराउँदै एकदिवसीय विश्वकपको छनोटमा छनोट भएको हो ।

Leave a Comment

Your email address will not be published. Required fields are marked *